ភ្នំពេញ៖ សាខា ក.ប.ប. រាជធានីភ្នំពេញ បានចុះត្រួតពិនិត្យទីតាំងផលិតឈាមជ្រូក និងសណ្តែកបណ្តុះចំនួន២ទីតាំង ស្ថិតនៅភូមិ១៧ សង្កាត់បឹងសាឡាង ខណ្ឌទួលគោក រាជធានីភ្នំពេញ ដោយរកឃើញថាការផលិតពុំមានអនុលោមភាព និងមានផ្ទុកសារធាតុគីមី។
តាមលទ្ធផលនៃការត្រួតពិនិត្យ មន្ត្រីក.ប.ប. បានរកឃើញ
ឈាមជ្រូក បន្លំយកឈាមគោមកធ្វើជាឈាមជ្រូក ហើយផលិតសណ្តែកបណ្តុះមានដាក់បន្ថែមសារធាតុគីមី
មិនស្របតាមបទប្បញ្ញត្តិបច្ចេកទេស តាមលក្ខខណ្ឌតម្រូវផ្នែកអនាម័យម្ហូបអាហារ គុណភាពសុវត្ថិភាពផ្នែកអតិសុខុមប្រាណជីវសាស្ត្រ ស្របតាមបទប្បញ្ញាត្តិនៃច្បាប់។
មន្ត្រីជំនាញ បានដកហូតផលិតផលឈាម ចំនួន៥១គីឡូក្រាម និងសណ្តែកបណ្តុះដែលបន្ថែមសារធាតុគីមី ចំនួន២២គីឡូក្រាម សរុបចំនួន ៧៣គីឡូក្រាម។
ក្រោយការត្រួតពិនិត្យ និងការពន្យល់ណែនាំអំពីច្បាប់ដល់ម្ចាស់ទីតាំងទាំង២ខាងលើ ម្ចាស់ទីតាំងបានយល់ព្រមបញ្ឈប់ការដាក់លាយសារធាតុបន្ថែម(សារធាតុគីមី) លើការផលិតសណ្តែកបណ្តុះ ឬមិនបន្តការផលិតសណ្តែកបណ្តុះទៀត
បញ្ឈប់ការផលិត ឈាមជ្រូកធ្វើពីឈាមគោ និងរៀបចំអនាម័យ ទុកដាក់សម្ភារ វត្ថុធាតុដើម ឱ្យបានល្អ។
ម្ចាស់ទីតាំងបានស្នើសុំការរៀបចំរយៈពេល៣ខែដើម្បីកែតម្រូវអនាម័យទីតាំងឱ្យបានល្អ និងសហការជាមួយសមត្ថកិច្ចជំនាញ ដើម្បីចុះផ្ទៀងផ្ទាត់ពីភាពត្រឹមត្រូវក្នុងការធ្វើអាជីវកម្មនេះ៕